HAUR ETA NERABEENTZAKO BULEGOA

Arartekoko Haur eta Nerabeentzako Bulegoa 2010ean sortu zen. Erakundearen jarduera osoan haurren ikuspegia gogoan izan dadin bermatzen du. Erakundeko gainontzeko arloen antzera, adin txikikoek zuzenean edo legezko ordezkarien bidez egindako kontsultak eta kexak hartzen eta ikertzen ditu, edo haurrekin zerikusia dutenak.

Lan hori nolabait erreaktiboa da norbaitek (pertsona nahiz taldea izan) edo zerbaitek (hedabideen edo beste bide batzuen bitartez ezagutzen dugun balizko eskubide-urratze bat) azaltzen digun gaiaren aurrean, eta beste lan-lerro proaktiboago batzuek osatzen dute, adibidez, honako helburuok lortzera bideratutako jarduerek: sareko lan kolektiboa eta lankidetzakoa sustatzea, haurren eskubideen gaineko kultura zabaltzea, eta, oso bereziki, adin txikikoek berek parte hartzeko eta beren hitza entzunarazteko aukerak bultzatzea.

Ararteko erakundea konprometituta dago, bere antolaketa esparruan, neska-mutilen interes gorena babestearekin bat datozen portaerak sustatzen, eta erakunde segurua da haurrentzat eta nerabeentzat. Horretarako, neskato, mutiko eta nerabeak babesteko politika bat dauka. Politika horren bitartez gauzatzen da babesteko helburu orokorrarekin gure erakundeak duen konpromisoa, eta portaera profesional eta pertsonalaren estandar gorenak bermatu nahi ditu, haurrek eta nerabeek kalterik jasan ez dezaten Arartekoko jarduera edo proiektuetan parte hartzen dutenean.

Haur eta Nerabeen Kontseilua

Informazio gehiago

Albisteak

Haurren Defentsa-erakundeen Europako Sarearen Adierazpena, non berriz adierazten baita oso kezkatuta daudela Gazako Zerrendan haurren eskubideak etengabe eta gero eta gehiago urratzen direlako

Gazako haurrek bizi duten egoera latzak hunkituta, izan ere, beraien oinarri-oinarrizko eskubideak larriki eta etengabe hausten dira, Ararteko erakundeak bat egiten du Haurren Defentsa-erakundeen Europako Sarearen (ENOC) erakunde-adierazpenarekin, sare horretako kide baita...

Ikusi gehiago

Arartekoaren hausnarketak haur eta nerabeen kontrako indarkeria-ekintzen gainean

Ararteko erakundeak gaitzespenik irmoena adierazten du joan den ostiralean, Bilbon, Jasmina Eva 13 urteko neskatoa erail zutelako, eta bere dolumina helarazten die haren familiari eta lagunei

Ikusi gehiago

Arartekoak Haurren Defendatzaileen Europako Sarearen udaberriko mintegian parte hartu du

Maiatzaren 26an eta 27an, Arartekoaren haurren eta nerabeen bulegoko eta nazioarteko gaien bulegoko bi teknikarik, parte hartu zuzten Luxemburgon, Haurren Defendatzaileen Europako Sarearen (ENOC) udaberriko mintegian, Luxenburgoko Haurren Defentsa Erakundeak antolatuta.

Mintegiaren lehen egunean, haurrek osasun fisikorako duten eskubidearen babesari eta sustatzeari eskaini zitzaion, hori baita ENOCek 2025erako duen lanaren gai nagusia. Hala, Europako haurren eta nerabeen defentsa-erakundeetako ordezkariek gogoeta egin zuten haurrek osasun fisikoko zerbitzuetarako sarbidea izateari buruz eta bizimodu osasungarria sustatzeko dauden tresnei buruz.

Mintegiaren bigarren egunean, defentsa erakundeek asiloa eskatzen duten haurren zaintza eta haiei kalitateko arreta ematearen gaia jorratu zuten, migrazioari eta asiloari buruzko EBko Itunaren testuinguruan, EMN Migraziorako Europako Sarearekin lankidetzan. Arartekoaren teknikariek, Kataluniako Síndic de Greuges eta Andaluziako Defentsa Erakundeko ordezkariekin batera (biak ENOCeko kideak), eta Kanarietako Komuneko diputatuaren laguntzarekin, hizlari gisa aritu ziren Espainiako lurraldean haur migratzaileen eta asilo-eskatzaileen kalitatezko arretak dituen erronkei buruzko mahai batean, bereziki, Andaluziako, Kataluniako, Euskadiko eta Kanarietako administrazio publikoei dagozkien betebeharrei erantzunez.

Ikusi gehiago

Arartekoko Nerabeen Kontseiluaren bilera

Asteburu honetan Arartekoko Nerabeen Kontseiluak beste bilera bat egingo du Donostiako Uba aterpetxean, urteko hirugarrena.

Topaketa horretan, Kontseiluko neska-mutilek beren lana amaituko dute aurtengo aukeratu zen gaiari buruz: osasun fisikorako eskubidea.

Aurreko urteetan bezalaxe, Kontseiluak ikasturte honetan burutu duen hausnarketa ENOC sareko haurren defentsa-erakunde batzuetako beste partaidetza-talde eta -kontseilu batzuen lanarekin batera egin da, ENYA –European Network of Young Advisors– proiektuaren barruan. ENYA programak 13 eta 17 urte bitarteko nerabeen partaidetza esanguratsua bultzatzen du, eta Arartekoko Kontseiluak bertan aktiboki parte hartzen du 2017. urteaz geroztik.

Arartekoko Kontseiluak maiatzeko azken asteburu honetan Donostian adosten dituen proposamen eta gomendioak FORUM ENYA 2025era eramango dituzte bi ordezkarik. Forum hori Kroazian egingo da, uztailean, eta han gure ordezkariak Europako hainbat eskualdetako defentsa-erakundeetako kontseiluetako beste nerabe batzuekin elkartuko dira, lurralde bakoitzean egin dituzten gogoetak elkarri adierazteko.

Vitoria-Gasteiz, 2025eko maiatzaren 30a

Ikusi gehiago

Arartekoak Euskadiko gazteen jarrera matxistei buruzko azterlana aurkeztu die Irungo La Salle ikastetxeko ikasleei

Maiatzaren 7an, Arartekoaren haurren eta nerabeen bulegoko eta berdintasuneko bi teknikari Irungo La Salle ikastetxean izan ziren batxilergoko ikasle talde bati Arartekoaren "Jarrera matxistak Euskadiko nerabeen eta gazteen artean" azterlana aurkezteko. Arartekoa ikastetxean egoteak ikasle talde batengandik zuzenean jasotako eskaerari erantzuten zion. Ikasle horiek, gure gizartean eragina duten arazoei eman beharreko erantzunei buruz hausnartzeko proiektu baten esparruan, Arartekoari helarazi zioten erakundeak, giza eskubideen ikuspegitik, emakumeen eta gizonen berdintasunaren arloan egiten duen lana aurkezteko nahia.

Arartekoaren hitzaldian, azterlanaren aurkikuntza eta gomendio nagusiak partekatu ziren, emakumeen eta gizonen berdintasunaren defentsari eta diskriminazioaren aurkako borrokari dagokienez. Nolanahi ere, hitzaldiak Arartekoak gazteen artean egindako lana ezagutarazteko eta ikasleak nerabe gisa aitortuta dituzten eskubideei eta eskubide horiek baliatzearen garrantziari buruz sentsibilizatzeko balio izan zuen.

Ikusi gehiago

Haurren Defentsa-erakundeen Europako Sarearen (ENOC) adierazpena, Europar Batasuneko mugetan haur eta nerabe migratzaileak babesteari buruzkoa, Migrazioari eta Asiloari buruzko Ituna onartzearen ondorioz

Arartekoak bat egiten du ENOCen adierazpen horrekin, zeinak beharrezkotzat jotzen baitu berme eraginkorrak ezartzea adingabe horien eskubideak benetan babesteko, izan ere, Itunak kezka sortzen du, Europako mugetan jaso lezaketen tratuarengatik.

Haurren Defentsa-erakundeen Europako Sareak (ENOC) bere baitan hartzen ditu Europako 34 herrialdetako haur eta nerabeen eskubideak babesteko 44 erakunde. Sare horrek behin eta berriz eta etengabe adierazi du kezkatuta dagoela haur eta nerabe migratzaileen egoeragatik, eta hainbat gomendio egin ditu haien gainean eta haien eskubideak hobeto babesteko premiaz, nazioarteko eta eskualdeetako araudiaren arabera.

2015. urteaz geroztik, milioika haur eta nerabe iritsi dira Europara segurtasun eta babes bila. 2020tik, Europar Batasuneko (EB) herrialdeetan, adingabeen 800.000 asilo-eskaera berri baino gehiago erregistratu dira, eta horietatik 113.000 baino gehiago bakarrik edo beren familiengandik bananduta dauden adingabeenak dira.

Orain, EBko estatu kideak 2024ko apirilaren 10ean onartutako Migrazioari eta Asiloari buruzko Ituna aplikatzeko prestatzen ari direnean, ENOCek uste du berme eraginkorrak ezarri behar direla haur eta nerabe horien eskubideak benetan babestuko direla ziurtatzeko, izan ere, Itunak kezka sortzen du, Europako mugetan jaso lezaketen tratuarengatik.

Baldin eta Itunean erantzukizunak banatzeko eta elkartasunerako aurreikusi diren tresnak egiaz eraginkorrak ez badira, itun horrek ez du konponduko lehen sarrerako estatuen gaineko "presioa". Mugetan giza eskubideak urratzeko eta asiloa eskatzeko eskubidea are gehiago higatzeko arriskua arindu nahi bada, giza eskubideak bermatzeko tresna nahikoak ezarri behar dira, besteak beste, ikuskatzeko mekanismo eraginkor eta independenteak, zaurgarritasunaren kontuzko ebaluazioak eta bideratze bizkorrak egokituta dauden zerbitzuetara (adibidez, haurrak babesteko zerbitzuak eta osasun-laguntza), informazio kritikoa eta laguntza juridikoa ematea, nazioetan ustezko tratu txarrak azkar eta eraginkortasunez ikertzeko sistemak.

EBk eta bere estatu kideek inbertsio ekonomiko eta operatiboak lehenetsi behar dituzte, asilo eta harrerarako sistema nazionalak baliabideez behar bezala hornitzeko. Jendeari, kosta ahala kosta, Europara heltzeko asmoa kentzen ahalegindu beharrean, estatuek oinarrizko eskubideak eta pertsonen duintasuna defendatzen jarri beharko lukete arreta.

Arartekoak, ENOC sareko kide denez, bat egiten du horien eskubideak babesteko propio egin den erakunde-adierazpen horrekin.

ENOCen ERAKUNDE-ADIERAZPENA

Vitoria-Gasteiz, 2025eko otsailaren 12a

Ikusi gehiago

Ikusi guztiak