Arartekoaren komunikatua Hondarribiko Alardea dela eta
2023ko irailaren 8a
Bihar, irailaren 8an, Manuel Lezertua arartekoa Hondarribian izango da emakumeek Alardean gizonen baldintza beretan parte hartzeko duten eskubidea erabat babesteko.
Oraingo honetan, Igor Enparan alkateak gonbidatuta, arartekoa, udalbatzarekin eta gainerako erakundeekin batera, Andre Maria parrokiako elizpean izango da alkate berriak Jaizkibel konpainiari lehen aldiz egingo dion harreran.
Gainera, arartekoa Alardean izango da udal agintari gorenaren ekimena babesten duela adierazteko, Hondarribiko herritarrak Alardearen inguruan batzeko apustuan. Alarde hori ondare komuna izango da, eta bertan pertsona guztiek, emakume zein gizon, parte hartu ahal izango dute, haien ideiak edo usteak edozein direla ere. Horretarako, arartekoa udalbatzaren eta gainerako erakundeen ondoan jarriko da, Alardearen harrera ofiziala egiteko tradizionalki erabili izan den tokian, elizaren atarian, alegia.
Arartekoak horren aldeko apustua egin du, aribidean diren ahaleginak eta kudeaketak laguntzeko, hau da, emakumeek festaren ekitaldi nagusian parte hartzeko aldarrikapenaren inguruan Hondarribian gertatzen ari den blokeo historikoari amaiera emateko, elkarrizketa aktibo baten bidez beste modu batzuk aztertuko dituen etapa berri bat irekitzen laguntzeko. Urteetan sortutako pitzadurak gainditzeko ahalegin zintzo eta berritzailea da, Hondarribiko herri osoa bildu dadin, emakumeek Alardearen ospakizunean bete-betean parte hartzeko duten aldarrikapen justu eta legitimo baten alde. Arartekoak benetan uste du horrelako keinu ausarten bidez soilik alda daitekeela denbora luzez barneratu dena, interesa duten sektoreek elkarren artean uler daitezen, elkarrizketarako espazioak eta zubiak sustatuta, Hondarribiko Alardearen inguruan dagoen eten sozial iraunkorra eraldatzeko.
Vitoria-Gasteiz, 2023ko irailaren 7a